युनेस्को व लंडनस्थित वार्की फाउंडेशन यांच्या संयुक्त विद्यमाने दिला जाणारा ग्लोबल टीचर प्राईझ या पुरस्काराची आज घोषणा झाली. सोलापूर येथील परितेवाडी जिल्हा परिषद शाळेतील शिक्षक रणजितसिंह डिसले हे सात कोटी रुपयांच्या पुरस्काराचे मानकरी ठरले आहेत.
लंडन मधील नॅचरल हिस्ट्री म्युझियम मध्ये झालेल्या समारंभात सुप्रसिद्ध अभिनेते स्टीफन फ्राय यांनी याची अधिकृत घोषणा केली.ग्लोबल टीचर प्राईझ पुरस्कार मिळणारे ते पहिलेच भारतीय शिक्षक ठरले आहेत. जगभरातील १४० देशांतील १२ हजार हुन अधिक शिक्षकांच्या नामांकनातून अंतिम विजेता म्हणून डिसले गुरुजींची घोषणा करण्यात आली आहे.QR कोडेड पुस्तकांच्या माध्यमातून महाराष्ट्रचं नव्हे तर देशातील शिक्षण क्षेत्रांत अभिनवं क्रांती केलेल्या कामाची दखल घेत त्यांना हा पुरस्कार जाहीर झाला आहे.
पुरस्काराच्या एकूण रक्कमेपैकी पन्नास टक्के रक्कम अंतिम फेरीतील नऊ शिक्षकांना देण्याचे रणजीतसिंह डिसले यांनी जाहीर केले आहे. या निधीतून नऊ देशांतील हजारो मुलांना गुणवत्तापूर्ण शिक्षण दिले जाईल.
डिसले गुरुजींना मिळालेली रक्कम ते टीचर इनोव्हेशन फंड करीता वापरणार असून त्यामुळे शिक्षकांमधील नवोपक्रमशिलतेला चालना मिळेल.या यशाबद्दल रणजितसिंह दिसले यांचे देश भरातून अभिनंदन होत आहे.
