यंदाच्या दिवाळीत याही पेक्षा दुसरं काही स्वस्त मिळेल काय?

यंदाच्या दिवाळीत याही पेक्षा दुसरं काही  स्वस्त मिळेल काय ?

महागाईने विविध वस्तूंचे दर गगनाला भिडले...तेल, डाळी,किराणा माल, भाजीपाला,फराळाचे पदार्थ महागले...दिवाळीने दिवाळ काढले...कुटुंबाचे बजेट कोसळले...अशी ओरड सणासुदीच्या पार्श्वभूमीवर घराघरांतून ऐकायला मिळते.दिवाळीत सारं काही महागल पण एक गोष्ट मात्र अजून स्वस्तात भेटते..चकित झालात ना.यंदाच्या दिवाळीत साहित्य रुपी फराळ वाचकांना फक्त आणि फक्त एक रुपयात मिळणार असल्याची गुड न्यूज आहे.

भिलवडी सार्वजनिक वाचनालय साहित्य क्षेत्रातील दर्जेदार १०० दिवाळी अंक फक्त आणि फक्त १०० रुपयात वाचावयासाठी उपलब्ध करून देत आहे.सार्वजनिक वाचनालय भिलवडी यांचे वतीने प्रतिवर्षी प्रमाणे याही वर्षी १०० रुपयात १००  दिवाळी अंक वाचा हा वाचन वृद्धी करणारा अभिनव उपक्रम याही वर्षी राबविण्यात येणार असल्याची माहिती वाचनालयाचे अध्यक्ष गिरीश चितळे आणि कार्यवाह सुभाष कवडे यांनी दिली.

गेली वीस वर्षे वाचनालयाच्या वतीने हा उपक्रम राबविण्यात येतो सभासदांनी शंभर रुपये भरून सलग सहा महिने दिवाळी अंक वाचण्याची संधी उपलब्ध करून देण्यात येते. जे ग्रामस्थ सभासद नाहीत त्यांना अनामत म्हणून दोनशे रुपये ज्यादा भरून या योजनेत सहभागी होता येते.साहित्य,बालसाहित्य,कृषी,शिक्षण,क्रीडा,महिलाविश्व,पर्यावरण,विज्ञान, विनोदीसाहित्य, रहस्यमय साहित्य, रहस्य कथा आधी विविध विषयांवरचे महाराष्ट्रात प्रसिद्ध होणाऱ्या दर्जेदार प्रकाशन संस्थांचे   वाचनीय दिवाळी अंक या योजनेतून सभासदांना देण्यात येणार आहेत. यावर्षी ३१ ऑक्टोबर २०२४ रोजी वाचनालयाच्या सभागृहात दिवाळी अंकांचे भव्य प्रदर्शन भरविण्यात येणार आहे. हे प्रदर्शन सर्वांसाठी विनामूल्य खुले आहे.या दिवाळी अंक उपक्रमामध्ये जास्तीत जास्त सभासदांनी ग्रामस्थांनी सहभागी व्हावे व दिवाळी अंक वाचण्याचा आनंद घ्यावा असे आवाहन गिरीश चितळे आणि सुभाष कवडे यांनी वाचनालयाचे वतीने केलेले आहे.