भिलवडी पोलीस व स्थानिक गुन्हे अन्वेषण विभागाची दबंग कामगिरी; २१ मोटासायकलीसह ठकसेन ताब्यात
भिलवडी प्रतिनिधी:
आठवडी बाजार,गर्दीच्या ठिकाणी लावलेल्या मोटारसायकली हेरून त्या शिताफीने गायब करून पुन्हा विकणाऱ्या एका ठकसेनास भिलवडी पोलीस व स्थानिक गुन्हे अन्वेषण विभागाने रंगेहाथ पकडून त्याच्याकडून २१ मोटर सायकली जप्त केल्या.त्याच्याकडून जप्त मुद्देमालाची अंदाजे किंमत सहा लाख ६३ हजार रुपये इतकी आहे.पोलिसांनी ताब्यात घेतलेल्या संशयिताचे नाव सुदिप अशोक चौगुले (वय- ३७) रा.पाटील गल्ली, भिलवडी ता.पलूस,जि. सांगली असे असून पोलिसांनी पोलीसी खाक्या दाखवताच त्याने गुन्हयाची कबूली दिली आहे.
गाडी विकायला आला अन् सापळ्यात अडकला ...
गोपनीय खबऱ्याकडून प्राप्त माहितीच्या आधारे एक इसम कदमवाडी ते सांगलीवाडी रस्त्यावर बिना नंबर प्लेट ची मोटर सायकल विक्रीसाठी येणार असल्याचे समजले. सदर ठिकाणी निगराणी करीत असता एक इसम हिरो होंडा कंपनीच्या स्प्लेंडर प्लस मोटरसायकल जवळ संशयितरित्या उभारलेला निदर्शनास आला.स्थानिक गुन्हे अन्वेषण विभागाकडील पोलीस उपनिरीक्षक कुमार पाटील व पथकाने शिताफीने त्यास ताब्यात घेऊन त्यास पोलिसी खाक्या दाखवताच तो पोपटासारखा बोलू लागला. काही दिवसांपूर्वी माळवाडी गावातील आठवडी बाजारातून चोरी केलेली मोटारसायकल विक्रीसाठी आणल्याचे कबूल केले.
बाजारातून चोरलेल्या मोटरसायकली तो शेतात लपवायचा...
मोटरसायकली बाबत पोलीस स्टेशनचा क्राईम अभिलेख पडताळला असता, भिलवडी,पलूस,सांगली शहर,जत, कडेगाव, चिंचणी, वांगी पोलीस ठाण्यात मोटरसायकल चोरीचे गुन्हे दाखल झाले असल्याची खात्री झाली. बाजार,गजबजलेली गर्दीची ठिकाणे,दारू, बिअर बार,मंदिरे आदी ठिकानाहून भर दिवसा तो मोटर सायकली पसार करायचा.चोरलेल्या मोटरसायकली त्याने वसगडे ( ता.पलूस)गावचे हद्दीत शेतामध्ये लपवून ठेवल्या असून त्याची तो विक्री करणार होता.या ठिकाणाहून पोलिसांनी नऊ मोटर सायकली ताब्यात घेतल्या. सदर आरोपी व जप्त मुद्देमाल पुढील तपास कामी भिलवडी पोलिस ठाण्याकडे वर्ग करण्यात आल्यानंतर भिलवडी पोलिसांनी सखोल तपास केला असता,सुदिप चौगुले याने वेगवेगळ्या ठिकाणाहून आणखी काही मोटरसायकली चोरी केले बाबतची कबुली दिली. भिलवडी पोलिसांनी वेगवेगळ्या गुन्ह्यातील आणखी १२ मोटरसायकली सह त्याच्याकडून एकूण २१ मोटरसायकली जप्त करण्यात केल्या.
सदरची कारवाई सांगली जिल्हा पोलीस अधीक्षक संदीप घुगे, अप्पर पोलीस अधीक्षक रितू खोखर यांचे मार्गदर्शनाखाली स्थानिक गुन्हे अन्वेषण विभागाचे पोलीस निरीक्षक सतीश शिंदे,उपनिरीक्षक कुमार पाटील, नागेश कांबळे, बसवराज शीरगुपी, संदीप पाटील, अतुल माने, अरुण पाटील, सुशील मस्के, श्रीधर बागडी,सुरज थोरात, प्रमोद साखरपे, ऋतुराज होळकर ,सुमित सूर्यवंशी, विनायक सुतार, गणेश शिंदे, सायबर पोलीस ठाणेकडील कॅप्टन गुंडवाडे, विवेक साळुंखे,भिलवडी पोलीस ठाण्याचे सहाय्यक पोलीस निरीक्षक भगवान पालवे, पोलीस हेडकॉन्स्टेबल महेश गस्ते,प्रवीण सुतार,भाऊसाहेब जाधव,धीरज खुडे, संतोष जाधव,रोहित माने,सोहेल शेख, सुमित खोत,गणेश शिंदे,प्रकाश पाटील,अरविंद कोळी आदींच्या पथकाने सदर कारवाई केली. भिलवडी पोलीस पोलिसांनी केलेली ही सर्वात मोठी कारवाई असून,नागरिकांकडून त्यांचे अभिनंदन होत आहे.
