किर्लाेस्करवाडी: शैक्षणिक गुणवत्ता, शिस्त, संस्कार व सामाजिक उत्तरदायित्वाच्या जोरावर गुणवत्तापूर्ण शैक्षणिक प्रगतीची मोहोर उमटविणाऱ्या विकास चॅरिटेबल ट्रस्टच्या किर्लोस्कर हायस्कूल अँड ज्युनिअर काॅलेज, किर्लाेस्करवाडी येथील शाळेने बारावीच्या निकालाची दैदिप्यमान परंपरा यावर्षीही कायम ठेवली आहे.
महाराष्ट्र राज्य माध्यमिक व उच्च माध्यमिक शिक्षण मंडळाचा इयत्ता बारावीच्या परीक्षेचा निकाल मंगळवारी ३ ऑगस्ट रोजी ऑनलाइन जाहीर करण्यात आला. यावर्षी प्रथमच करोना महामारी संसर्गामुळे बारावीची परीक्षा रद्द करण्यात आली होती. त्यामुळे राज्य शासनाने ठरवून दिलेल्या निकषांनुसार बारावीतील विद्यार्थ्यांचे मूल्यांकन करताना दहावी, अकरावी आणि बारावी अशा तीन वर्गांचे गुण विचारात घेण्यात आले आहेत. दहावी आणि अकरावीच्या लेखी परीक्षांचे प्रत्येकी ३० टक्के, तर बारावीचे ४० टक्के गुण गृहित धरण्यात आले आहेत.
अंतर्गत मूल्यमापनाद्वारे जाहीर करण्यात आलेल्या बारावी परीक्षेत १०० टक्के उच्चांकी निकाल प्राप्त करून किर्लोस्कर ज्युनिअर काॅलेजने गरुडभरारी घेतली आहे. सातत्याने उच्चांकी निकालाची परंपरा जोपासणाऱ्या या काॅलेजमध्ये प्रथम क्रमांक गौतमी पवार ९३.५०%, द्वितीय क्रमांक तृप्ती जाधव ९२.५०%, व तृतीय क्रमांक सायली पवार ९२.००% गुण प्राप्त करत मिळवला आहे . या उच्चांकी निकालात २७ विद्यार्थ्यांना विशेष श्रेणी, ७ विद्यार्थ्यांना प्रथम श्रेणी मिळाली आहे.
या सर्व विद्यार्थ्यांना प्रभारी प्राचार्य यु.बी.कुलकर्णी, कनिष्ठ कॉलेज विभागप्रमुख प्रा.सौ.जे. एस. पाटील, वर्गशिक्षक प्रा. जी. यु. कुलकर्णी तसेच सर्व शिक्षक-शिक्षिका यांचे मार्गदर्शन लाभले. या सर्व यशस्वी विद्यार्थ्यांचे व त्यांना मार्गदर्शन करणाऱ्या शिक्षकांचे कौतुक व अभिनंदन संस्थेच्या अध्यक्षा सौ.प्रतिमा किर्लोस्कर, संस्थेचे सर्व विश्वस्त, विद्याधिकारी श्री विवेक कुलकर्णी, प्रभारी प्राचार्य यु.बी.कुलकर्णी, प्रशासकीय अधिकारी सौ. सुधा मोहिते यांनी केले.
संस्थेच्या सक्षम, कर्तृत्ववान व कुटुंबवत्सल नेतृत्वाखाली नव्या प्रोत्साहनात्मक योजना तसेच टाटा टेक्नॉलॉजी व मायक्रोसॉफ्ट टीम्सच्या माध्यमातून ऑनलाइन शिक्षण कार्यान्वित केल्यामुळे किर्लोस्कर काॅलेजची दमदार व नेत्रदीपक वाटचाल सुरू आहे.
